Монгол Улсын уртын дууч, ардын урлагийн нэрт зүтгэлтэн, Зууны манлай уртын дуучин Жигзавын Дорждагвын мэндэлсний 120 жилийн ойд зориулсан “Уртын дуу – Өв эрдэнэ” сэдэвт олон улсын эрдэм шинжилгээний хурал өнөөдөр Монгол Улсын Боловсролын Их Сургуулийн Багшийн сургуулийн Урлагийн танхимд амжилттай болж өндөрлөлөө.

Энэхүү хурал нь:

• Монголын үндэсний уртын дууны өв соёл, түүхэн хөгжил, онцлогийг судалж, түгээн дэлгэрүүлэх

• Ж.Дорждагва агсны урлагийн их өвийг хойч үед нь өвлүүлэн үлдээх

• Уртын дууны уламжлалт ба орчин үеийн хөгжил дэвшилд хувь нэмэр оруулах зорилготойгоор зохион байгуулагдсан юм.

Хуралд:

• Монгол Улсын Ардын жүжигчин, Гавьяат жүжигчид, нэрт уртын дуучид

• Ардын урлаг судлалын тэргүүлэх эрдэмтэн судлаачид

• МУБИС-ийн багш, оюутнууд

• Ж.Дорждагва агсны үр хүүхэд, төрөл төрөгсөд
  өргөнөөр оролцож, илтгэл хэлэлцүүлэн, урлаг соёлын үзүүлбэрээр баяжуулсан нь хурлын ач холбогдлыг улам өргөлөө.

Ж.Дорждагва нь 1904 онд Түшээт хан аймгийн Говь Түшээ гүний хошуу, өнөөгийн Дундговь аймгийн Сайхан-Овоо сумын нутагт мэндэлж, ХХ зуунд үндэсний уртын дууны их өвийг бүтээж, дуулж, судалж, сурган зааж үлдээсэн үнэт гавьяатай уран бүтээлч байв. Түүний шавь нарын төлөөлөл, уртын дуучдын үе үеийн төлөөлөл, эрдэмтэн судлаачид энэ өдөр эрдмийн илтгэлээ хэлэлцүүлж, түүний өвийг дээдлэн хүндэтгэв.

Энэхүү хурлыг зохион байгуулсан МУБИС-ийн Багшийн сургуулийн Урлагийн боловсролын тэнхим, эрхлэгч доктор Ч.Отгонбаяр болон хамт олонд гүн талархал илэрхийлье.

“Уртын дуу – өв эрдэнэ” — өвөг дээдсээс өвлөгдөн ирсэн үнэт соёлоо дээдлэн хүндэлж, эрдэм номоор гийгүүлэх үйлс мөнхөд үргэлжилнэ.